Ёолкны мод шиг хачиргүй жинхэнэ ертөнц, элдэв янзын маяг үгүй жинхэнэ адгууслаг хайр, жинхэнэ хөгжим, жинхэнэ хүмүүс, fallen angels. Дэлхий дээр ганцхан өнгө, хар, бусад нь хуурамч. Харин хар өнгө ганцхан төрөл бишийг харуулсан бүтээл. Hail Brusselmans.
Гурван тахир дутуу эр (гэхдээ гитар тоглож, дуулахтайгаа) алдарт зохиолч, хуучин бөмбөрчин (Ex Drummer) Дрис (Дрис ван Хеген тоглосон)-тэй уулзаж, тэдний хамтлагт бөмбөрчин хэрэгтэй байгаа тухай хэлснээр кино эхэлнэ.
Басс гитарчин нь татанхай гартай, дуучин нь дультраа хэлтэй ба эмэгтэй хүнийг алах хоббитой, харин гитарист нь сонсголын хувьд асуудалтай бөгөөд засрашгүй хар тамхичин. Нэг үгээр хэлбэл тэд зохиолчийн яг эсрэг тал, азгүй амьтад, хог шаарууд. Тэд Дрисийн нэр хүндээр амжилт олохоор бодсон ба Дрис ч үүнийг мэддэг. Гэсэн ч тэр уг хамтлагт орохоор шийддэг. Харин орохын тулд тэрээр тахир дутуу байх шаардлагатай ба түүний тахир дутуу нь бөмбөр тоглож чаддаггүй байх аж.
Үүнээс цаашаа бичихгүй ээ, өөрснөө үзэцгээ. Ямартаа ч энэ кино чиний үздэг хуурамч хайр дурлалын тухай кино огт биш. Ганцхан хар өнгөөр үргэлжлэх энэ кинонд улиг болтлоо сонсдог сайхан сэтгэл, нөхөрлөл, үнэнч шудрагын хэлтэрхий ч байхгүй. Зөвхөн бодит байдал, тэгээд бодит байдал.
Гэрэл хуурамч, гэрлийн үүсгэж буй өнгүүд ч хуурамч. Хэрвээ чи гэрэл дотор амьдардаг тэрнээсээ өөр зүйл харж чадахаа больчихсон, өөрөөсөө бусдыг харахыг хүсдэггүй бол энэ киног үзээд хэрэггүй. Гэхдээ чиний мэдэхгүй ертөнц бас байдаг юм гэдгийг ойлго. Харанхуй ямар үзэсгэлэнтэй, ямар энхрий гээч. Түүнчлэн энэ кинон дээр гарч буй дүрүүд ч мөн адил. Тэдэнд бусад шиг хуурамч зүйлс хэрэггүй. Тэд бол та нарын нэрлэдэг азгүй амьтад, гаж хүмүүс биш жинхэнэ сахиусан тэнгэрүүд.
